Este acontecemento, pioneiro en España, contou con participación integramente galega e foron moitos os profesionais das telecomunicacións implicados no proxecto, tanto desde a fase de deseño (da rede, mapa dixital e dos equipamentos de aboado), como na de planificación, desenvolvemento, posta en servizo, operación e mantemento da nova tecnoloxía dixital. Sen esquecer que a propia tecnoloxía empregada nos máis de 1.000 decodificadores de televisión dixital terrestre repartidos pola Administracion entre os habitantes da Fonsagrada para o momento do apagado, pertencen á empresa galega Televés.

Faustino Castro durante a súa poñencia

Precisamente ésta foi unha das claves do relatorio impartido no salón de actos da ETSET de Vigo polo representante do COETG. Faustino Castro comezou a súa poñencia contestando á pregunta de qué pode supór a curto prazo o exemplo do recente programa piloto da Fonsagrada para o enxeñeiro de telecomunicación en Galicia e sobre as saídas que lle ofrece o mercado laboral no marco da era da dixitalización. A través da súa propia experiencia, Faustino Castro referíuse tamén á evolución e desenvolvemento da profesión no mercado estatal, o posible salto dos novos titulados aos mercados internacionais; á absorción de coñecementos e ao exercicio da actividade profesional ao amparo do COETG. Así mesmo, afondou no futuro emprendedor para o profesional das TIC a través da figura de “enxeñeiro-empresario”.

O Colexio Oficial de Enxeñeiros de Telecomunicación de Galicia mantén unha firme aposta por achegar o mundo laboral aos futuros profesionais das telecomunicacións na nosa Comunidade. Proba disto foi a súa participación activa no Foro Tecnolóxico do Emprego, que incluíu no seu programa, ademais de conferencias, mesas redondas e outras actividades vinculadas á toma de contacto coa realidade das empresas.